Trajneri Ilir Daja foli sot në konferencë shtypi, në prag të ndeshjes kundër Jagiellonias në Poloni, e vlefshme për Play-off-in e Conference League. Ai u shpreh:
“Po e filloj me një kujtesë afatshkurtër, që Jagiellonia ka bërë shumë mirë vjet në Ligën e Konferencës, ku në dijeni time është eliminuar në çerekfinale. E di që është nga ekipet më të forta të Polonisë dhe bën një futboll të mirë gjatë fazës mbrojtëse dhe në sulm, kjo si meritë e trajnerit dhe stafit të tij. Kanë gjithmonë të pranishëm lojtarin e 12-të, publikun.
Dihet se klubet që dalin deri në “play off”-in e Ligës së Konferencës janë ekipe që e meritojnë dhe një nga këto është edhe Jagiellonia. Pra, përballë do të kemi një ekip të fortë dhe për të bërë ne punën tonë, duhet të sakrifikojmë shumë.
E falënderoj kolegun për fjalët që ka thënë. Edhe ne jemi një ekip me histori e traditë në futbollin shqiptar, por që rikthehemi në Europë pas disa vitesh mungesë.
Mandela dhe Zabërgja? Janë dy lojtarë që kanë qenë golashënuesit tanë më të mirë në sezonin e fundit dhe futbollistë shumë të rëndësishëm për ne. Por, tashmë ne u kemi uruar suksese në klubin e ri ku kanë shkuar në Ukrainë. Ndonëse koha është e shkurtër, duhet të mësohemi se ata nuk janë më pjesë e skuadrës sonë. Së fundmi, kemi bërë një afrim në merkato, që nesër mund të jetë pjesë e lojës, si në start dhe gjatë zhvillimit të sfidës. Do të mundohemi që sa i përket pjesës së lojës, t’i zëvendësojmë sa më mirë të jetë
Çdo tur ndryshon nga turi tjetër, ashtu siç ndeshjet ndryshojnë nga njëra-tjetra. Hajduku dhe Jagiellonia janë dy ekipe të forta, po se ku dallojë do të preferoja që të mos i citoja, sepse nesër do ta kemi kundërshtar Jagiellonian.
Të gjitha energjitë psikofizike ne i kemi te ndeshja e radhës, jo te e kthimit. Pasi nga kjo varet edhe si do të dalë rezultati. Nëse marrim një rezultat pozitiv, padyshim do të kemi më shumë tifozë. Në të kundërt, mund të ndodhë situatë tjetër.”