Ka përfunduar në fazën e Play-off-it të Conference League aventura europiane e Dinamo City. Skuadra jonë barazoi 1-1 në “Air Albania” ndaj Jagiellonias dhe u eliminua, pasi ndeshjen në Poloni e humbi me rezultatin 3-0.
Dejvi Bregu i dha avantazhin Dinamos në pjesën e dytë, duke ndezur shpresat të paktën për fitore, por polakët barazuan.
Trajneri Daja aktivizoi këtë formacion: Teqja, Meksi (Maliqi), Aliji, Beqja (Dita), Lorran, Qefalija (Qardaku), Karamba (Farruku), Bregu, Nani, Vila (H.Berisha), B.Berisha.
Ecuria në Europë ishte mjaft pozitive për skuadrën tonë, duke kulmuar me eliminimin e Hajduk Split në turin e tretë. Tani vëmendja kalon e gjitha në kampionat, te ndeshja me Vllazninë, që do të luhet të dielën në “Elbasan Arena”.